Seinustu umferð lokið

Hæ öll,

hér er mynd af mér með stráknum sem ég keppti við í síðustu umferð. Hann er frá Ísrael, og gaf mér gjöf fyrir umferðina. Ég mátaði hann í fimmtíu og sjö leikjum held ég. Hann var ekki mjög sterkur, tefldi þessa Petrovs vörn sem er frekar ömurleg.

Nú er mótinu lokið og við förum til London á morgun. Þá ætla ég í British Museum og McDonalds. Nú sit ég uppi á herbergi hjá Hjörvari sem er að pakka niður í tösku. Nú var Verónika að koma og hún vann!! Hún er snilli. Vignir vann líka, og Felix gerði jafntefli. Mikki er enn að tefla svo við bíðum eftir honum, svo förum við niður á strönd og fáum okkur calamari eða eitthvað að borða. Við fórum líka í hádeginu, það var svo mikið af fólki í matsalnum að maður var næstum troðinn undir. Rússarnir eru alveg ferlegir svo við þurftum bara að fara annað.

Þetta er búið að vera frábært mót, ég hef teflt við stráka frá Ísrael, Georgíu, Austurríki, Þýskalandi, Búlgaríu og Rússlandi. Ég enda með 4,5 vinning af 9 sem er miklu minna en ég ætti að geta fengið því að ég get alveg unnið strákana sem eru á efstu borðunum. Ég fór aðeins út af laginu í þriðju umferð þegar ég var að tefla við strákinn frá Georgíu, þar sem ég gat fyrst unnið og svo náð jafntefli en ég var dálítið gráðugur og tapaði þeirri skák að lokum. Hann endaði í 11 sæti, sá strákur.  Þetta er rosa góð reynsla og þegar maður er búinn að fara á eitt svona mót, þá veit maður betur hvernig maður á að undirbúa sig undir hverja umferð.

Nú var Mikki að koma og hann var með jafntefli, sem er bara fínt.
Bless, bless allir og takk fyrir að lesa bloggið mitt.
Kv.
Óskar

Áttunda umferð seinni partinn

Nú er áttunda umferð seinni partinn. Ég er að fara að tefla á móti Rússa, en ég var líka að tefla við Rússa í gær og ég vann hann. Hann var ekki mjög sterkur, ég mátaði í 38 leikjum. Nú er ég að undirbúa mig undir drottningarpeðsopnun, en ég er með svart. Hann gæti reyndar líka notað enska opnun, sem væri bara ágætt, ég verð undirbúinn undir bæði.

Gunni vildi fleiri sögur af Boris. Hann Boris er sko ekkert rosalega klár. Hótelið tók vegabréfin okkar og ætlaði bara að geyma þau, en við föttuðum fljótlega að það væri trúlega ekki góð hugmynd. Ef að þau geta týnt lyklum, þá geta þau týnt vegabréfum. Þannig að Áróra fór að ná í vegabréfið sitt og Boris lét hana hafa vegabréfið hans Stefáns! Þau eru sko ekkert mjög lík, Áróra og Stefán. Svo fór Mikki og Boris sagðist vera búinn að týna vegabréfinu hans, svo að Mikki þurfti bara sjálfur að finna það fyrir Boris.

Nú erum við búin að dreifa kynningarblaði um Reykjavík open í morgun og svo verð ég að undirbúa mig undir næstu umferð. Við fengum 4 vinninga í fyrradag og þá fengum við að henda Hjörvari út í sundlaugina í gær. Svo fengum við fimm vinninga í gær, og þá held ég að við getum hent honum út í sjó. Það verður aldeilis gaman. 

Sjötta umferð á eftir!

Á eftir er sjötta umferð að byrja. Ég er að fara að tefla við annan strák frá Austurríki og verð með svart, sem er eiginlega bara betra fyrir mig. Hann hefur ekki unnið neina sterka, svo ég ætti að eiga góða möguleika. Ég fékk kveðju frá bekknum mínum í Ölduselsskóla og bið að heilsa ykkur öllum!!

Þarna erum við Vignir fyrir síðustu umferð. Hann hefur staðið sig geðveikt vel og er í 1-4 sæti í sínum flokki!! Frábært hjá honum :)

Við keppum á öðrum stað en hinir sem eru eldri og mamma bíður fyrir utan húsið allan tímann sem ég er að keppa. Þarna er hún og Stefán, pabbi Vignis.

Bless í bili.
Óskar

Fleiri myndir

Fyrst að ég get núna sett inn myndir, þá eru hér myndir frá því að ég hef verið að byrja umferðirnar í skákinni:

Fyrsta umferð að byrja hjá mér.

Þetta er þriðja umferð, þá var komin rigning og ég bara hress. Ég var ekki eins hress þegar skákin var búin því að ég tapaði og hefði átt að vinna!!

Hér er fimmta umferð að byrja, allir fengu skákbækur gefins. Ég tapaði fyrir þýskum strák sem tefldi gömlu vörnina mína, karo cann. Algjört klúður hjá mér, ég var ekki búinn að undirbúa mig undir karo með hvítu og var búinn að gleyma þessum varíant.

Gamli bærinn

Í gær fórum við líka í labbitúr um gamla bæinn í Budva, sem er mjög fallegur. Hér er líka hægt að fá mjög góðan ítalskan ís alls staðar. Straggiatella er uppáhaldið mitt. Svo fór allur hópurinn saman út að borða í gærkvöldi, og við fórum í mini skemmtigarð og 7D bíó á leiðinni heim.

Frídagur í gær

Í gær var frídagur hjá okkur og ég fór í siglingu með mömmu, Veróniku og Mikka. Það var rosa gaman, hér eru nokrkar myndir:

Er að fara í umferð 4

Ég tefldi í gær við gaur frá Georgíu og tapaði eftir þrjá og hálfan tíma, í svona 70 leiki. Hann tefldi einhverja hundleiðinlega Petrovs vörn, en ég kom samt ágætlega út eftir opnunina. Það var komið myrkur þegar ég var loksins búinn. Við tefldum báðir ágætlega og ég hefði alveg átt sjens í að vinna, og svo í jafntefli svo ég var smá svekktur, en það er líka fínt að hafa tvo af þremur. Verónika er svo hress og hún sagði að það væri alveg hægt að taka vinning af manni en ekki reynsluna. Hún veit hvað hún syngur, hún Verónika. Nú eru allir farnir að tefla nema ég og Vignir, en við erum að fara uppeftir núna. Ég er að fara að tefla við Þjóðverja og ætla að gera mitt besta!

Myndir inni á facebook

Hæ,
það er ekki sjens að setja myndir hér inn, svo þær eru inni á facebook hér:
https://www.facebook.com/groups/375454012588772/

Svo er heimasíða mótsins hér, þar sem öll úrslitin koma inn:
http://www.budva2013.org/

U8 og U10 byrja að keppa kl. 4 en hinir kl. hálf 4, sem er þá kl. 2 og hálf 2 að íslenskum tíma.
Bless
Óskar

Önnur umferðin!

Hæ allir
Í gær var umferð númer tvö. Ég keppti við strák frá Georgíu sem var mjög góður. Skákin var í tvo og hálfan klukkutíma og þá gafst hann upp því að ég var að ná drottningu uppi í borði og þá var ég með unnið. Ég var með svart og tefldi eitt afbrigði af Sikileyjarvörn. Ég var kominn upp á  borð 9 þá. Núna er ég kominn í 1-14 sæti, og raðast í fjórða sæti af þessum fjórtán, svo að ég er örugglega kominn upp á fjórða borð núna held ég. Í dag er ég líka að tefla við annan strák frá Georgíu, sem er land í austur Evrópu.

Vignir var búinn aðeins á undan mér og náði jafntefli, svo að hann er taplaus, sem er gott. Hilmir vann líka sína skák og svo náði Mikki jafntefli líka. Vonandi gengur þriðja umferð vel hjá íslenska liðinu í dag. Ég er búinn að stúdera með Hjörvari og hinir eru allir að læra núna líka. Ég á eftir að slá skákinni minni frá því í gær inn í tölvuna, en ég geri það eftir hverja umferð til að skoða þær og læra af þeim.

Í gær var geðveik rigning, eldingar líka og allt svaka blautt. Sem betur fer kom ég með regnstakkinn minn og mamma keypti líka risastóra regnhlíf. Núna er aftur komin sól, mamma segir að það sé af því að hún keypti regnhlíf, annars væri örugglega ennþá rigning.

Boris fann sko ekki lykilinn okkar aftur en við fengum einhvern ónýtan aukalykil sem gekk ekki almennilega að hurðinni. Við læstumst inni í herberginu og þurftum að klifra út af  svölunum en svo kom viðgerðarmaður og skipti um lás. Við erum komin með nokkur moskítóbit svo við pössum okkur vel í kvöld. Við spilum gúrku úti á svölum á kvöldin, en Vignir vann í fyrradag og mamma í gær. Ég var í öðru sæti.

Það er erfitt að setja myndir inn hér, en svo er líka inni á facebook sem heitir EM ungmenna Budva - Monte Negro 2013 eða eitthvað svoleiðis

Þar er mynd af mér þegar önnur umferðin er að byrja og fleira dót frá hinum í hópnum. Jæja, ég ætla að skella mér út í sundlaug sem ég hef ekki haft tíma til að prófa ennþá. Það er kominn tími til.

Bless, bless, allir
Óskar

Fyrsta umferðin!!!

Hæ allir,

ég þurfti að vakna klukkan fjögur um nótt af því að ég þurfti að fara í flugvél.  Pabbi keyrði okkur mömmu út á völl þar sem við hittum allt liðið. Ég flaug með Wow air til London. Við þurftum að bíða heillengi á flugvellinum í London. Síðan flaug ég með Easy Jet til Dubrovnik sem er í Króatíu. Þá var komið kvöld. Síðan þurftum við að keyra í rútu í tvo og hálfan tíma til Budva í Svartfjallalandi þar sem mótið er haldið. Á leiðinni fórum við með ferju, klósettin þar voru óóóógeðsleg. Við komum á hótelið okkar klukkan hálf tólf eða eitthvað og keyptum okkur brauð og salami í kvöldmat.

Hótelið er rosa fínt, með sundlaug og öllu, en núna er Boris í afgreiðslunni búinn að týna lyklinum okkar, svo við höfum ekki lykil að herberginu núna. Hann var ekki að skilja að það væri bara nóg að opna herbergið, hélt ekki að við þyrftum sjálf lykil til að læsa því seinna. Aumingja Boris þegar mamma fer aftur að tala við hann á eftir.

Svo fór ég að tefla kl. 4 í dag. Það voru sko frekar margir þarna, sérstaklega frá Tyrklandi, Rússlandi og Georgíu, heilu hóparnir af skákkrökkum. Við sem erum í flokkum undir 8 ára og 10 ára stráka og stelpna, við erum í einhverjum barnaskóla sem er frekar sjúskaður. Allir hinir keppa í íþróttahúsi bæjarins sem er sko alls ekki flott heldur.  Ég drakk fullt af vatni og þurfti að fara að pissa eftir svona klukkutíma. Klósettin á ferjunni voru ógeðsleg, en þessi voru fimm sinnum ógeðslegri. Það var sko bara gat á gólfinu sem maður átti að kúka og pissa í, sem var ógeðslegt. Sem betur fer þurfti ég bara að pissa. Enginn klósettpappír og engin sápa til að þvo sér og gólfið var rennblautt. Ég hef aldrei í lífinu séð svona ógeðslegt klósett!!

Ég var að tefla við strák frá Austurríki sem heitir Marc. Ég var með hvítt og fékk miklu betri stöðu en síðan klúðraði ég og hann var með unnið. Og síðan klúðraði hann! Og ég bara mátaði hann og vann!!! Hann  var sko bara góður en ég kom samt betur út úr opnuninni. Vignir vann líka og Jokko gerði jafntefli, svo ég var mjög ánægður með það. Það voru allir í efri flokkunum að tefla geðveikt langt upp fyrir sig.

Jæja, ég ætla að fara að borða núna. Það er rosalega erfitt að komast á netið, svo að ég get kannski ekki alltaf sett inn á bloggið og ég get heldur ekki sett inn myndir ennþá. Prófa bara aftur seinna.

Kv.Óskar

Velkomin á bloggið mitt

Nú er ég kominn með blogg af því að ég er að fara til Svartfjallalands á Evrópumótið í skák. Ég var valinn í landsliðið í skák í júní og er búinn að æfa mikið síðan þá. Það hafa verið æfingar með liðinu og þjálfurunum Hjörvari Steini og Helga Ólafssyni, en þeir eru sko skáksnillingar. Ég keppi í opnum flokki undir 8 ára og fer út 28 september og verð til 10 október. 
Ég blogga fyrir vini mína og kennarann minn líka, en bloggið er heimaverkefnið mitt fyrir skólann á meðan ég verð úti.